Board logo

標題: 報到第一帖 [打印本頁]

作者: raehk    時間: 2012-7-20 14:52     標題: 報到第一帖

等左一個月,終於收到通知已通過論壇審核,成為新會員,我先同大家打聲招呼,順道分享我家食barf 體驗/歷程

我家中養既係兩隻本地短毛貓,兩兄弟5月尾接番屋企時約5星期大 (流浪貓冇準確出生日期)
我係養貓新手,因第一次養貓而上網搵資料做功課,就係咁接觸到餵barf 既概念
了解左之後決定全餵barf,想要盡我所能俾最好既生活俾佢地,一路到今日佢地差不多3個月大,食左barf 有個多月喇

轉食barf 之前兩兄弟食過幾日乾糧,知道乾糧唔係咁好之後我就轉晒俾主食罐頭,再然後遇上barf就轉成餵barf
而開始餵barf 我就係一轉就轉晒果隻,佢地適應得好好,鍾意食到同我清碟
而且期間冇任何腸胃問題,可能佢地仲細,唔係純種貓,體質易適應又為食

依個幾月嚟我買barf,Dr. B 同 K9 (Feline) Natural 兩個牌子都買過 (BigDog 都想試但香港好似冇佢地既貓barf 賣?)
因為想趁兩兄弟仲細等佢地試下唔同口味
即所謂diversification / don't put all my eggs in one basket 是也
Dr. B 就火雞同兔肉都買過;K9 既貓barf 我只買到過「羊+雞」
兩兄弟真係好俾面,俾邊隻食邊隻,咩肉對佢地胃口嚟講就好似冇乜分別
不過觀察所得,佢地鍾意Dr. B 多啲
嚟緊我會買埋Dr. B 既袋鼠肉俾佢地試
之前想買但未買到,因為最方便我既兩個零售點都唔入貨,聽講係因為貓既袋鼠肉barf 銷量較小

我屋企既難兄難弟究竟有幾鍾意食barf 呢?
係鍾意到癲左
一到食飯時間就發瘟
一放飯以光速標去糧兜度
一分鐘唔夠同我食完, 然後移形換影去舔到對方個兜乾乾淨淨,洗完碟都仲叫到拆天要我加糧
(以前食罐頭多數有剩,唔算多但都有啲)

我話夠喇,攤開手表示冇晒
咁佢地嗌多幾聲就開始四圍索,尤其係我隻手,好似我有收埋咁
餵食我俾啱分量架,有以佢地體重同年紀計住數,
而且佢地其實夠飽,只係因為生肉太好味而扭食
因為佢地只會扭一陣,好快唔記得就開始玩,所以我肯定佢地係為食唔係真肚餓

我有keep住同佢地磅重,調整餵食分量
依家佢地各重約900g,我一日餵兩餐
每餐每貓俾四分之一塊Dr. B,咁樣兩貓每日分食一塊啱啱好
另外我每餐都會加水伴碟,一來飽肚啲,二來等佢地「自動」飲多啲水

每星期我又會額外俾冰鮮雞頸餐佢地食
即係我唔駛返工,日頭喺屋企的話,會加一餐,等佢地有三餐飽飯食
加嗰餐會俾冰鮮雞頸,既可潔牙又可促進兩貓兩顎發育 (但上下顎咁強健要嚟做咩?咪又係咬我或者咬爛屋企啲野?其實整蛊緊我自己......)
佢地咬雞頸都一樣猖狂
我拎住佢地會搶,一口叼左去
有時我俾唔切,佢地就會一貓一邊咬住同一嚿扯大纜,個口咬實唔放仲要喉嚨發出咆哮聲兇對方
好多時等到佢地各自咬左嚿雞頸行開食,我唔想一地都係咪攞糧兜一貓一個塞去佢地面前想接住囉
佢地就會以為我想搶佢地口中既雞頸,於是咬實件雞頸"fee"我,一邊入後波一邊用手打我隻手
我就次次好委屈咁表明立場:「我唔係想搶呀大帝s,我要你件雞頸做咩喎!」

佢地食雞頸又係超快,之前5分鐘唔駛食半條 (佢地而家夠大可以一貓一條,就要食5-10分鐘)
有時一快一慢,食得快嗰隻會吼住另一隻既雞頸,會伏低身好似準備捕獵咁想撲過去搶
咁既時候我就要拉開搶食嗰隻

轉左食barf 個幾月,我既經驗係除左生肉/骨味道好,兩貓好鍾意兼且適應冇問題之外
佢地既消化吸收我發現真係變得更好
屎尿真係冇乜味,便便又一體成形,得左!

兩貓生理發展理想,好精神,越來越百厭
跑跳好叻,特別鍾意走上我膊頭
一時登高望遠,一時伏低俯瞰, 一時向左走向右走巡視,有時更走去我後頸"摷"我頭髮 @@
我朋友話咁樣似「金鷹」!仲要係一孖!嚟緊佢地會幫我捉蝨 (我邊樹有蝨!),同埋我將來唔駃憂,唔駛做等佢地賣藝表演養家就得喎~~~~

P.S. 我上星期約左一班朋友食飯,順路買冰鮮雞頸,用冰袋入住。朋友問係咩嚟,我講完成棚人不約而同話「乜貓唔係食貓糧既咩?!」
聽完好心酸...........
.

作者: raehk    時間: 2012-7-20 15:00

Sorry, 睇嚟我放錯區
請版主搬此帖去吹水區,唔好意思!
作者: BARFHK    時間: 2012-7-23 11:27

比你講到我都好想收養番隻貓添。
作者: raehk    時間: 2012-7-23 16:27

呵呵...我見人養狗有時都會恨,想自己都養番隻
不過覺得養狗既家居條件同照顧要求較高
尤其我鍾情大型狗
擔心自己應付唔嚟,所以唔敢諗
我最想養既就係版主你頭像中嗰種牧羊犬
聰明聽話披毛又靚
可能係因為細路仔時睇神犬拉茜,至今一直對隻神犬念念不忘

作者: arkit019    時間: 2012-7-24 17:50

我都係新會員
都養左2隻布偶貓貓(1男1女)
多多指教~~
作者: raehk    時間: 2012-7-25 13:37

引用:
原帖由 arkit019 於 2012-7-24 17:50 發表
我都係新會員
都養左2隻布偶貓貓(1男1女)
多多指教~~
咁你係唔係新俾兩隻貓轉食barf? 轉食過程順唔順利?
作者: arkit019    時間: 2012-7-26 13:16

都唔可以話好順利=0=
開頭我唔俾佢地食野半日
之後轉DR B,隻男既佢絕食左4日
終於係DR B+雞柳+佢喂食既天性下
餐餐都食飽既
隻女既一開頭食左1日之後
同我絕食6,7日!!!!!
因為隻女既佢係布偶妹
人地果D平均都有4KG以上 而佢1歲果時先得2KG= ="
可能品種問題...
我試下溝乾糧,倒雞精,整熟半成,全熟,溝小食,溝雞肉,
點都唔肯食....之後只好屈服...由頭黎過
俾番乾糧佢...食左3日之後又開始逼佢食DR B...
絕食1日 之後溝雞肉...都算肯食 但只係食雞肉= ="
呢段時間已經維持左3星期....好心痛
作者: raehk    時間: 2012-7-26 17:25

引用:
原帖由 arkit019 於 2012-7-26 13:16 發表
都唔可以話好順利=0=
開頭我唔俾佢地食野半日
之後轉DR B,隻男既佢絕食左4日
終於係DR B+雞柳+佢喂食既天性下
餐餐都食飽既
隻女既一開頭食左1日之後
同我絕食6,7日!!!!!
因為隻女既佢係布偶妹
人地果D平 ...
雖然我冇同樣問題
但我明白嗰種心痛法......

我睇過論壇依度好幾個有關討論
聽講將Dr. B 混合其他食物時既方式都會有影響
例如一開始溝雞肉時落少啲Dr. B (甚至少到好少,目的只係等雞肉帶有生肉味),同埋兩者溝勻啲,等貓貓唔可能淨揀雞肉出嚟...
你係咪都已經試過?

如果係我,我會拉長個過渡期,長到用上好幾個月,耐心咁逐漸加生肉減熟肉
每次加減都係微調
而且貓貓一接受到Dr. B 比例新高,就連續用同樣比例餵食起碼一星期先再到下一輪
唔急進,等佢唔覺唔覺咁適應新口味
用時間意志嚟磨
或者鐵杵真能成針呢?

作者: arkit019    時間: 2012-7-27 13:18

引用:
原帖由 raehk 於 2012-7-26 17:25 發表



雖然我冇同樣問題
但我明白嗰種心痛法......

我睇過論壇依度好幾個有關討論
聽講將Dr. B 混合其他食物時既方式都會有影響
例如一開始溝雞肉時落少啲Dr. B (甚至少到好少,目的只係等雞肉帶有生肉味),同埋兩者溝勻啲 ...
你講既2樣方法我都試過LU~
而你既微調方法都試過...
但可能係我果隻貓女既問題 就算變左小小佢都唔會願意食
我都諗過習慣左1排之後再加D...
但係又會忽然間佢地又食....
所以真係好奇怪
我地呢d做貓奴既只好進努力啦~~

仲有1次係食曬DR B雞肉味之後..我買新一盒番黎
2隻都唔食,但係之前一直都有食開 仲清碟 = ="點知買左新既番黎又玩絕食.... 所以...唉

[ 本帖最後由 arkit019 於 2012-7-27 13:22 編輯 ]
作者: raehk    時間: 2012-7-30 18:56

引用:
原帖由 arkit019 於 2012-7-27 13:18 發表

你講既2樣方法我都試過LU~
而你既微調方法都試過...
但可能係我果隻貓女既問題 就算變左小小佢都唔會願意食
我都諗過習慣左1排之後再加D...
但係又會忽然間佢地又食....
所以真係好奇怪
我地呢d做貓奴既只好進努 ...
哇,貓貓咁刁咀好難攪喎
仲係喜好無定向嗰隻
而且聽你講都盡力試過唔同方法
真係唔知有咩解決方法
我又係新手幫唔到你啲咩
唯有幫你打下氣啦~~

作者: BARFHK    時間: 2012-8-2 13:54

引用:
原帖由 raehk 於 2012-7-20 14:52 發表
P.S. 我上星期約左一班朋友食飯,順路買冰鮮雞頸,用冰袋入住。朋友問係咩嚟,我講完成棚人不約而同話「乜貓唔係食貓糧既咩?!」
聽完好心酸..........
令我記起在電視上(可能是Jamie Oliver去學校?)看到一個外國小朋友,比個薯仔佢,佢唔知係乜黎。因為對他來說,薯仔係一條條炸過的。

現今世界,健康飲食之道,再不是吃一些"有益"的食品,而且吃少一點"無益"的食物。這幾年,常常有主人話比我聽轉了BARF後幾咁神奇,譬如隻貓唔再肚瀉啦、個貓盤唔再臭到暈啦、隻貓體重無變但覺得大隻咗啦、甚至後生翻活躍咗等等!

其實說穿了,隻貓本身係咁架,只要停止比無益的食物,健康係好自然既事。
作者: raehk    時間: 2012-8-6 13:02

係囉係囉~~~

以前冇咁多精製食物,用新鮮天然材料自煮為多,食野只要定時定量均衡就可以,而家食品製造係盤大生意,就算係新鮮蔬果肉食,都會有農藥色素激素禁藥造假等一籮問題,何況經連串加加減減工序既商業食品。無論係人食既定係動物食既,仲要小心注意埋原材料、養殖過程、產地、成分、生產程序、製造日期、貯存期限等等等等。真係版主話齋,個關注焦點扭曲左,以前諗既係喺一堆好野裏面揀最正既野食,而家科技發達、金錢掛帥,煩惱既係要點避開有害傷身既食物。輸少當贏,食少啲冇益野就已經拍手稱慶。

類似既例子我聯想起母乳v.s.嬰兒奶粉,都係冇嗰樣整嗰樣,係純為商業利益製造出嚟既urban illusion. 我當年中學個生物老師成日強調大自然就係最好既設計師,所有動植物今時今日既形態習慣,都已經係最適直此時此地既生存繁衍。係人類聰明反被聰明誤,畫蛇添足諗多左。





歡迎光臨 BARF 香港論壇 (http://www.barf.com.hk/forum/) Powered by Discuz! 6.1.0